„K4“ osvojili Olimp

Time to read
2 minutes
Read so far

Utorak, 12. lipnja 2018. - 9:12
Autor: 

Članovi Avanturističkog kluba "K4" iz Tivta Dejan Milošević, Miroslav Andrić i Željko Manojlović, uspješno su odradili još jednu ekspediciju, uspon na planinu Bogova, Olimp.

„U četvrtak, 7.6. oko 17:00 krećemo iz Tivta, i u petak oko 3:00 ujutro preko Albanije stižemo u Grčku, u podnožje planine Olimp u mjestu Litohoro. U 8:00 dolazimo u mjesto Prionija na 1100 m nadmorske visine i tamo ostavljamo kola, pakujemo se i krećemo na uspon. Pored vodopada na samom početku rute, i kroz četinarsku šumu stižemo do kamenjara koji vodi do kampa A Spilios Agapitos (2100mnv), čuvenom stazom E4 (samo jednim njenim dijelom jer ta pješačka staza duga je oko 10000km, i počinje u Portugalu a završava na Kipru,i predstavlja jednu od 12 European Long Distanace Paths). Još jedan član kluba koji je išao sa nama Mladen Pinjatić ostaje u kampu, a nakon kratke pauze Dejan, Miroslav i Željko kreću na tzv. juriš prema vrhu. Nakon kampa staza postaje mnogo strmija, prelazi se preko glečera, a vrućina i vjetar usporavaju kretanje. Na stazi srećemo mnogo planinara iz raznih djelova svijeta, Makedonije, Bugarske, Engleske, Njemačke, Čilea, čak i iz Kine. Inače planina Olimp ima 4 poznata vrha Mitikas (2918m), najviši vrh, ali tu su i Skala, Skolio i Stefani, tako da naša ruta E4 do samog vrha Mitikasa vodi preko vrha Skala, i već oko 14:30 nalazimo se na tom vrhu. Kratko se zadržavamo i krećemo ka najvišem vrhu, Mitikas. Nakon Skale put postaje mnogo strmiji i opasniji. Na par dijelova put je osiguran sajlama i sidrištima, međutim ni to ne umanjuje opasnost. Jednostavno taj put predstavlja čisti alpiniza i nije za svakoga, iz tog razloga mnogi planinari dođu do Skale i vrate se. Prelazimo preko kuloara između Skale i Mitikasa, i dolazimo do vertikale od nekih 100m koja vodi do samog vrha. Na tom putu kao i kasnije na samom vrhu nailazimo na tužne podsjetnike u vidu spomenika za planinare koji su svoje živote ostavili na planini. Pokušavam da skrenem misli sa toga i nastavljam dalje, isto rade i Željko i Miro. Posljednjih par metara, pred sam vrh nisu strmi i tako u 15:30 nalazimo se na vrhu planine Bogova, Mitikas. Čestitamo jedni drugima i slikavamo se. Sa ponosom ističemo zastavu kluba, kao i zastavu grada Tivta (po prvi put se grb Tivta zaviorio na neki od svjetskih vrhova). Njemci koji su par minuta nakon nas došli do vrha, slikavaju nas i raspituju se odakle smo. Zadržavanje na sami vrh potrajalo je kratko, jer se vrhu primicao tamni oblak a to nije nikako dobro. Međutim spuštanje je moralo biti sporo tako da nas je par metara pod vrhom uhvatila kiša koja je srećom kratko trajala. Spuštanje ide opet preko vrha Skala, stazom E4 do samog kampa. Važno je istaći da smo mi prvi Tivćani koji su uspjeli da "osvoje" Olimp, kao i to da uspon na Olimp obično traje 2 dana, međutim to ne bi bilo u maniru našeg kluba, tako da smo mi to odradili u roku od 7 i po sati, odnosno 12 sati od Prionije, preko Skale do Mitikasa i nazad u kamp Spilios Agapitos. Takav uspjeh vjerovatno vuče korijenje u motou našeg kluba, da sreća prati hrabre. U kampu noćimo, i ujutro krećemo spuštanje do Prionije, autom idemo u Litohoro i napokon u nedjelju oko 01:00 ujutro stižemo u Tiva“, kaže Dejan Milošević.