Prva samostalna izložba slika „U plavoj ariji“, mlade umjetnice iz Tivta Ane - Marije Pasković, sinoć je otvorena u Galeriji ljetnikovca Buća u Tivtu. Slikarica je izložila 22 rada, tehnikom ulje na platnu.

O stvaralaštvu umjetnice govorila je pjesnikinja i novinarka Dubravka Jovanović: „Kistom Tivćanke Ane - Marije Pasković kaplje vrijeme mora i kamena što ga fermavaju fasade starih primorskih kuća, ponti i parapeta, onih koji su još ostali u životu. Nove i lanterne skupile sjećanja na vezane barke i fišćot vapora, a kapelice i crkve na otocima zavjetne riječi predaka šapuću moru. Tamo đe Gospa spava, budni su valovi za nove plovidbe duha i gušta svih onih koji moraju kolurom, notom, perom u hodočašću ljepotama Boke kotorske“.

„Zato sam pred slikama umjetnice zastala duže, kao pred oblacima koji slike tvore i oblicima koji se odmah rasprše, ali se drugi, novi crtaju nebeskim platnom. Čini mi se da Ana Marija moleći bdije da zaustavi taj bokun neba što je sišao u nas i taj komadić mora što u akorde vječne bokeške pjesme zrijeva. Kroz škura sopstvene duše ova mlada slikarka prostor i plavu ariju koju diše, sebi hoće da pokori, pa joj zavičaj u jedno oko staje, drugim se iznova rađa“, ističe Dubravka Jovanović.